𝐄𝐑𝐌𝐄𝐑𝐀, 𝐒𝐞𝐬𝐭𝐚-𝐅𝐞𝐢𝐫𝐚, 𝟒 𝐀𝐛𝐫𝐢𝐥 𝟐𝟎𝟐𝟓—Sua Exelénsia, Vise Ministru Administrasaun Estatal, 𝐉𝐚𝐜𝐢𝐧𝐭𝐨 𝐑𝐢𝐠𝐨𝐛𝐞𝐫𝐭𝐨 𝐆𝐨𝐦𝐞𝐬 𝐝𝐞 𝐃𝐞𝐮𝐬, akompaña hosi Prezidente Autoridade Munisípiu Ermera, Sr. 𝐉𝐨𝐬𝐞́ 𝐌𝐚𝐫𝐭𝐢𝐧𝐡𝐨 𝐝𝐨𝐬 𝐒𝐚𝐧𝐭𝐨𝐬 𝐒𝐨𝐚𝐫𝐞𝐬, prezide serimónia tomada posse ba Xefe Suku Poetete Villa, Postu Administrativu Ermera, Sr. Arsenio Amaral; Xefe Suku Poetete Lodudu, Postu Administrativu Ermera, Sr. Eng. Eurico de Jesus Soares; Xefe Suku Coliate Leten, Postu Hatolia A, Sr. Pedro Martins ho Xefe Suku Assui -Lau, Postu Letefoho, Sr. Mario de Deus hamutuk ho Membru sira husi Konsellu Suku ba mandatu 2025-2032.

Nu’udar parte ida husi atividade tomada de posse ne’e, fahe mós fotografia ofisiál Prezidente Repúblika, Primeiru Ministru, no Membru Governu Ministériu Administrasaun Estatál nian, hodi tau iha sede suku. Aleinde ne’e, entrega komputadór foun ualu (8) ba xefe suku sira ne’ebé foin hetan posse, atu apoia sira-nia knaar administrativu.

Serimónia ne’e marka inísiu mandatu lideransa foun nian, hodi subliña sira-nia papél iha governasaun lokál no dezenvolvimentu komunitáriu ba tinan sira tuirmai. Tomada posse mak sai baze ba sira ninia mandatu hanesan prevista iha artigu 11 pontu 1 husi lei númeru 9/2016 hateten katak Membru sira husi Konsellu Suku hahú sira-nia manadatu ho tomada posse iha reprezentante Governu nian husi sirkunskrisaun (territoriu) administrativa iha ne’ebé sede suku lokaliza ba.

“Uluk nanain hato’o agradese ba Nai ohin ita bele hala’o Tomada de Posse ba Membru Konsellu Suku Lideransa Komunitaria foun eleitu tinan 2025 to’o 2032 iha Munisípiu Ermera. Hodi Ministériu Administrasaun Estatal  no Governu Sentral nia naran, hato’o parabéns ba komunidade no lideransa komunitaria foun Suku Assui-Lau (Postu Lete-Foho),  Koliati-Leten ( Postu Administrativu Hatulia A), no Poetete Lodudu ho nomeasaun xefe Suku foun ba Poetete Villa (Postu Administrativu  Ermera Villa )  substitui matebian Sr. Felizbertu das Neves  ne’ebé hala’o ninia kna’ar ukun nu’udar Xefe Suku iha tinan hatnulu resin, no Ha’u sei hasoru malu ikus ho maktoban iha inaugurasaun Estrada Programa PNDS iha aldeia Guegerema”, Vise MAE kongratula liu husi intervensaun.

Entretantu, serimónia tomada posse ne’e hala’o iha salaun Administrasaun Ermera, marka prezensa hosi Diretor Jerál Desentralizasaun Governu Lokál, Sr. Antonio A. Guterres, Diretor Nasionál no Xefe Departamentu MAE, Komandante PNTL Munisípiu Ermera, Komandante F-FDTL  Batallaun II Munisípiu Ermera, Administradór Postu Administrativu, Veteranus, Diretores Servisus Munisipais, Xefe Suku, Lia Nain no Morador, Xefe Aldeia no Komunidade. 𝐑𝐞𝐦𝐚𝐭𝐚* 𝐌𝐞𝐝𝐢@𝐌𝐚𝐞_𝟐𝟎𝟐𝟓