SISD Poetete, Lodudu 28-05-2026 – Serimónia hatur fatuk ain dahululuk ba projetu konstrusaun estrada iha área Urletoho, Suku Poetete Lodudu, Postu Administrativu Ermera, realiza ho susesu ho partisipasaun husi Ekipa PNDS Suku, Ekipa PNDS Posto Admistrativo, reprezentante Postu Administrativu, autoridade Munisípiu, lideransa lokal no komunidade sira.

Atividade ne’e marka hahú ofisial ba implementasaun projetu estrada ne’ebé komunidade identifika hanesan prioridade atu fasilita asesu transporte, hasa’e mobilidade komunidade no apoia dezenvolvimentu ekonómiku no sosial iha área refere.

Iha serimónia ne’e, representante autoridade sira hato’o apresiasaun ba esforsu hamutuk entre governu no komunidade sira atu realiza projetu infraestrutural ne’ebé bele fó benefísiu direta ba povu. Sira mos enfatiza importánsia partisipasaun komunidade durante prosesu implementasaun projetu atu asegura qualidade no sustentabilidade obra nian.

Koordenadór KPR Suku Poetete Lodudu dehan katak projetu estrada ne’e responde ba nesesidade komunidade nian ne’ebé durante tempu naruk hasoru difikuldade asesu ba merkadu, servisu públiku no fatin importante seluk. Ho konstrusaun estrada ne’e, espera katak kondisaun transporte no asesibilidade sei di’ak liután.

Komunidade sira ne’ebé marka prezensa iha eventu ne’e hatudu apoiu tomak ba projetu no kompromisu atu kolabora durante implementasaun obra. Sira espera katak projetu ne’e bele remata tuir planu no fó benefísiu ba populasaun tomak iha Suku Poetete no área sira besik.

Serimónia remata ho hatur fatuk ain dahululuk hanesan símbolu hahú konstrusaun estrada Urletoho, ho esperansa katak projetu ne’e sei kontribui ba dezenvolvimentu no bem-estar komunidade iha futuru.