| Poetete-Lodudu, Ermera – Prezidenti Autoridade Munisípiu halo vizita servisu ba Suku Poetete-Lodudu ho objetivu atu halo diskusaun direta ho komunidade kona-ba progresu no nesesidade dezenvolvimentu iha área sira hotu iha suku refere. Durante vizita ne’e, Prezidenti Autoridade Munisípiu hasoru malu ho lideransa suku, membru konsellu suku, juventude, feto no komunidade lokal sira. Enkontru ne’e fó oportunidade ba komunidade atu hato’o sira-nia preokupasaun, sujestaun no prioridade sira relasiona ho dezenvolvimentu iha suku. Iha diskusaun ne’e, tema importante sira ne’ebé ko’alia mak infraestrutura, bee moos, edukasaun, saúde, agrikultura, estrada no área dezenvolvimentu sosial no ekonomia sira seluk. Prezidenti Autoridade Munisípiu reafirma kompromisu governu lokal atu kontinua serbisu hamutuk ho komunidade hodi identifika no buka solusaun ba dezafiu sira ne’ebé komunidade enfrenta. Komunidade Suku Poetete-Lodudu simu diak vizita ne’e no espera katak rezultadu hosi diskusaun sira bele kontribui ba planeamentu no implementasaun programa dezenvolvimentu ne’ebé responde ba nesesidade real komunidade nian. Vizita ida ne’e hatudu importánsia kooperasaun entre autoridade munisípiu no komunidade lokal atu asegura katak dezenvolvimentu iha setor hotu-hotu bele lao ho diak no lori benefísiu ba povu. |
Leave a Reply