SISD Suku Poetete-Lodudu, 8 Jullu 2026 – Xefe Suku Poetete-Lodudu hamutuk ho aparat suku hala’o observasaun no monitorizasaun ba projetu konstrusaun gabion (brojon) ne’ebé daudaun ne’e implementa husi kompania iha área suku.

Observasaun ne’e halo atu haree diretamente progresu servisu no asegura katak implementasaun projetu lao tuir planu, kumpre padraun tékniku no remata tuir prazu ne’ebé determina ona.

Durante vizita ne’e, Xefe Suku ko’alia ho reprezentante kompania, fiskál obra no komunidade kona-ba dezenvolvimentu projetu. Nia husu ba kompania atu kontinua hala’o servisu ho responsabilidade, garante kualidade konstrusaun, proteje ambiente no asegura seguransa ba traballadór no komunidade durante prosesu obra.

Projetu gabion ne’e hakarak prevene erozaun no proteje rai, dalan no infraestrutura seluk husi estragus ne’ebé bele akontese durante tempu udan. Autoridade Suku Poetete-Lodudu sei kontinua halo observasaun no monitorizasaun atu asegura projetu ne’e remata ho di’ak no fó benefísiu ba komunidade tomak.