SISD Poetete Lodudu 19 Junu 2026 – Dekanu husi Fakuldade Siénsia Sosiais no Polítika (FSSP), ne’ebé mak parte husi Universidade Oriental Timor Lorosa’e (UNITAL), hala’o atividade sosial ida iha Suku Poetete Lodudu ho objetivu atu fahe informasaun ba komunidade kona-ba oportunidade asesu ba ensinu superior iha fakuldade refere. FSSP-UNITAL iha departamentu prinsipál tolu, mak Departamentu Komunikasaun Sosial, Administrasaun Públika no Relasaun Internasional. Departamentu sira ne’e prepara estudante sira atu sai profisionál iha área komunikasaun, governasaun no kooperasaun internasionál.

Iha oportunidade ne’e, Dekanu no ekipa FSSP esplika ba komunidade katak UNITAL kontinua loke dalan ba joven sira atu prossegue estudu superior ho programa akademiku ne’ebé responde ba nesesidade dezenvolvimentu nasaun nian. UNITAL mos fó oportunidade ba estudante foun sira atu rejista ba tinan akademiku foun no partisipa iha ambiente edukasaun ne’ebé promove kualidade no kompeténsia profisionál.

La’ós deit fó informasaun edukativa, FSSP-UNITAL mos demonstra nia kompromisu sosial liuhosi asaun solidariedade ida. Iha atividade refere, ekipamentu no nesesidade bázika sira fahe ba komunidade vulnerável, inklui maluk sira ho defisiénsia hamutuk ema na’in 15 resin. Inisiativa ida ne’e hatudu katak instituisaun edukasaun la’o hamutuk ho komunidade no kontribui diretamente ba bem-estar sosial.

Komunidade Poetete Lodudu simu ho di’ak atividade refere no hatete katak informasaun kona-ba asesu ba ensinu superior bele motiva joven sira atu kontinua estudu no prepara an ba futuru ne’ebé di’ak liu. Asaun sosial ne’e mos ajuda família sira ne’ebé presiza apoiu iha moris lorloron.

Atividade ne’e reforsa misaun FSSP-UNITAL atu la’o hamutuk ho komunidade, promove edukasaun, no habelar valor solidariedade no responsabilidade sosial ba ema hotu.