Ponte & Parke hanaran “B.J. Habibie“, hanesan ponte auto-estrada ho liña rua ne’ebe harii atu fó onra ba eis-Prezidente Indonézia B.J. Habibie. Ponte ida ne’e simboliza amizade entre nasaun Indonézia no Timor-Leste no sai ikon ida iha sidade Dili.
Ponte ne’e harii iha loron 29 Agostu 2019, nu’udar omenajen ba B.J. Habibie nia kontribuisaun hodi fó direitu ba Timor-Leste ba autodeterminasaun liuhosi referendu 1999 nian.
Aleinde fornese asesu ba estrada, ponte ne’e mós iha fatin halimar nian ba labarik sira, ne’ebé atrai vizitante lokál husi munisípiu seluk to’o turista rai liur tantu labarik to’o adultu hakarak vizita fatin ne’e.
Ponte ida ne’e mós hanesan fatin ida ne’ebé popular tebes bainhira atu hare loro-matan monu nia furak iha lokraik.
